ក្រុមហ៊ុន Microsoft ថ្មីៗនេះបានចាប់ផ្តើមធ្វើតេស្តសាកល្បងនូវមុខងារប្រព័ន្ធប្រតិបត្តិការថ្មីមួយមានឈ្មោះថា "Cloud Rebuild" សម្រាប់ប្រព័ន្ធប្រតិបត្តិការ Windows 11។ មុខងារនេះត្រូវបានបង្កើតឡើងដើម្បីជួយឱ្យអ្នកប្រើប្រាស់អាចធ្វើការដំឡើង (Reinstall) ប្រព័ន្ធ Windows ឡើងវិញបានយ៉ាងងាយស្រួល ក្នុងករណីដែលកុំព្យូទ័រជួបប្រទះបញ្ហាគាំងធ្ងន់ធ្ងរ រហូតដល់មិនអាច Boot ចូលទៅកាន់ Desktop បាន។

លែងខ្វល់រឿងប្រើ USB ឬកុំព្យូទ័រផ្សេងដើម្បីបុក Windows ទៀតហើយ
កាលពីមុន នៅពេលដែលកុំព្យូទ័រជួបបញ្ហាខូចឯកសារ System ធ្ងន់ធ្ងរ ឬបើកលែងឡើង (Boot Failure) អ្នកប្រើប្រាស់ជាទូទៅតម្រូវឱ្យមានកុំព្យូទ័រមួយផ្សេងទៀត ដើម្បីទាញយកឯកសារ Windows រួចចម្លងចូលទៅក្នុង USB Flash Drive (Bootable USB) ទើបអាចយកមកដំឡើងថ្មីបាន។

ប៉ុន្តែជាមួយមុខងារ Cloud Rebuild ថ្មីនេះ វានឹងលុបបំបាត់រាល់ភាពស្មុគស្មាញទាំងនោះ ដោយសារវាអាចដំណើរការបានដោយផ្ទាល់ចេញពីផ្ទាំង Windows Recovery Environment (WinRE)។ មុខងារនេះនឹងទាញយកទាំងឯកសារកូដកម្រិតស្ដង់ដាររបស់ Windows (Target Windows Image) និងកម្មវិធីបញ្ជាឧបករណ៍ (Device Drivers) ជំនាន់ចុងក្រោយដោយផ្ទាល់ពីសេវាកម្ម Windows Update តាមរយៈការភ្ជាប់អ៊ីនធឺណិត (ទោះជាតាមរយៈខ្សែ LAN ឬ Wi-Fi ក៏ដោយ)។

ភាពខុសគ្នារវាង "Cloud Rebuild" និង "Reset this PC"

អ្នកប្រើប្រាស់ជាច្រើនអាចនឹងច្រឡំមុខងារនេះទៅនឹងមុខងារ "Reset this PC" ដែលមានស្រាប់។ ទោះជាយ៉ាងណា មុខងារទាំងពីរនេះមានចំណុចខុសគ្នាដាច់ស្រឡះ៖

+ Reset this PC៖ ទាមទារឱ្យឯកសារ Windows ដែលមានស្រាប់នៅក្នុងម៉ាស៊ីនស្ថិតក្នុងស្ថានភាពល្អ ឬមិនមានការខូចខាតធ្ងន់ធ្ងរ ទើបអាចដំឡើងឡើងវិញបាន។

+ Cloud Rebuild៖ មិនពឹងផ្អែកលើសុខភាពរបស់ឯកសារនៅក្នុងម៉ាស៊ីនឡើយ។ ទោះបីជា Windows នៅក្នុងម៉ាស៊ីនត្រូវរងការខូចខាតទាំងស្រុងក៏ដោយ ក៏វានៅតែអាចទាញយកឯកសារថ្មីស្រឡាងពី Cloud មកដំឡើងជំនួសបានដែរ។

ដោយសារតែ Cloud Rebuild គឺជាដំណើរការបង្កើត និងដំឡើងប្រព័ន្ធប្រតិបត្តិការថ្មីស្អាតទាំងស្រុង (Clean Recovery Path) មិនមែនជាការជួសជុល (Repair Install) ឡើយ ដូច្នេះ Microsoft បានដាក់ផ្ទាំងព្រមានថា រាល់ទិន្នន័យចាស់ៗនៅក្នុងម៉ាស៊ីនអាចនឹងត្រូវបាត់បង់ អំឡុងពេលដំណើរការនេះ។

មុខងារ Cloud Rebuild នេះ គឺជាផ្នែកមួយនៃគម្រោង Windows Resiliency Initiative របស់ Microsoft ដែលជាយុទ្ធសាស្ត្រក្នុងការបង្កើនភាពធន់ និងសមត្ថភាពស្ដារខ្លួនឯងរបស់ប្រព័ន្ធប្រតិបត្តិការ Windows នៅពេលដែលវាទទួលរងផលប៉ះពាល់ពីការ Update មិនជោគជ័យ, បញ្ហាការកំណត់កម្រិតរចនាសម្ព័ន្ធ (Configuration Problems) ឬប្រព័ន្ធដំណើរការលែងកើត (Inoperative Systems)។

បច្ចុប្បន្ន មុខងារនេះកំពុងស្ថិតក្នុងដំណាក់កាលសាកល្បងនៅក្នុងជំនាន់ Experimental Windows Insider channel នៅឡើយ ហើយគេរំពឹងថា Microsoft នឹងដាក់ឱ្យអ្នកប្រើប្រាស់ទូទៅអាចប្រើប្រាស់ជាផ្លូវការ នៅក្នុងកំណែទម្រង់ Update ធំៗនាពេលខាងមុខ។