Monitor Samsung Odyssey ស៊េរីថ្មីៗ 2026 ប្រកាសចេញផ្លូវការ ផ្ដល់ជូនគុណភាពដល់ 6K 3D លើកដំបូងបង្អស់

ឆ្នាំ 2026 ខាងមុខនេះ Samsung បានធ្វើការប្រកាសចេញអេក្រង់ម៉ូនីទ័រស៊េរីថ្មីៗជាច្រើន ដែលមានផ្ដល់ជូនសមត្ថភាពកាន់តែខ្លាំង មិនធ្លាប់ឃើញមានពីមុនមកនោះឡើយ។ ចាប់ផ្ដើមពីម៉ូនីទ័រអេក្រង់ 3D មិនចាំបាច់ពាក់វ៉ែនតាដំបូងគេបង្អស់ ដែលមានផ្ដល់ជូន

គុណភាពខ្ពស់ដល់ 6K ក៏ដូចជាមានអេក្រង់ម៉ូនីទ័រផ្ដល់ជូនកម្រិត Refresh Rate ខ្ពស់បំផុតដល់ 1,040Hz រលូនមែនទែន។

Odyssey 3D ៖ អេក្រង់ 6K ប្រភេទ 3D មិនចាំបាច់ពាក់វ៉ែនតាដំបូងគេលើពិភពលោក

ម៉ូនីទ័រ 32” Odyssey 3D (លេខម៉ូឌែល G90XH) ជាអេក្រង់ដំបូងគេលើពិភពលោក ដែលមានសមត្ថភាពមើល 3D ដោយមិនចាំបាច់ពាក់វ៉ែនតាក្នុងគុណភាពខ្ពស់ដល់ 6K ផ្ដល់ជូនបទពិសោធន៍កាន់តែពិសេសដល់ការលេងហ្គេម និងការកម្សាន្ដនានា។ អ្នកប្រើប្រាស់អាចកំណត់ផ្លាស់ប្ដូរបានរវាង 6K 165Hz ឬ 3K 330Hz នៅក្នុងម៉ូនីទ័រ IPS នេះតែមួយក្រោមបច្ចេកវិទ្យា Dual Mode ហើយឆ្លើយតបលឿនត្រឹម 1ms GtG ក៏ដូចជាអាចបម្លែងរូបភាព 2D ទៅ 3D បាន។

Odyssey G6៖ អេក្រង់ 1,040Hz Refresh Rate ខ្ពស់ដំបូងគេលើពិភពលោក

ម៉ូនីទ័រ 27” Odyssey G6 (លេខម៉ូឌែល G60H) ក៏មានបំពាក់បច្ចេកវិទ្យា Dual Mode ដែលអនុញ្ញាតឲ្យផ្លាស់ប្ដូររវាងអេក្រង់ QHD 600Hz ឬ HD 1,040Hz បានទៅតាមចំណង់ចំណូលចិត្ដរបស់អ្នកប្រើប្រាស់។

Odyssey G8៖ អេក្រង់គុណភាពខ្ពស់ 6K, 5K និងមានជម្រើស OLED

ម៉ូនីទ័រ 32” Odyssey G8 (លេខម៉ូឌែល G80HS) ជាម៉ូនីទ័រ 6K ដំបូងមួយដែលអាចផ្ដល់ជូនកម្រិត Refresh Rate ខ្ពស់ដល់ 165Hz ឬផ្លាស់ប្ដូរទៅគុណភាព 3K 330Hz បានតាមបច្ចេកវិទ្យា Dual Mode នេះ។ចំណែកឯម៉ូនីទ័រ 27” Odyssey G8 (លេខម៉ូឌែល G80HF) ជាម៉ូនីទ័រមានបច្ចេកវិទ្យា Dual Mode ដូចគ្នា សម្រាប់ផ្លាស់ប្ដូររវាងអេក្រង់ 5K 180Hz និង QHD 360Hz ដើម្បីទទួលបានរូបភាពកាន់តែរលូន។

សម្រាប់អ្នកចង់បានសាច់ពណ៌ដិតស្រស់ស្អាតបំផុត ម៉ូនីទ័រ 32” Odyssey OLED G8 (លេខម៉ូឌែល G80SH) ភ្ជាប់មកជាមួយអេក្រង់ QD-OLED 4K ជាមួយ 240Hz refresh rate, កាត់បន្ថយចំណាំងផ្លាត Glare Free, កម្រិតពន្លឺ 300-nit brightness, ទទួលស្គាល់ដោយ VESA DisplayHDR™ True Black 500 certification ផងដែរ។

Samsung បានប្រាប់ថានឹងធ្វើការដាក់តាំងបង្ហាញអេក្រង់ម៉ូនីទ័រទាំងអស់នេះ នៅឯព្រឹត្តិការណ៍បច្ចេកវិទ្យាធំប្រចាំឆ្នាំ CES 2026 នៅចន្លោះថ្ងៃទី 6 ដល់ថ្ងៃទី 9 មករា 2026 និងផ្ដល់ជូនព័ត៌មានលម្អិតបន្ថែមទៀតនៅពេលក្រោយ។